Сілкініс

Қазталов ауданында жаңа бастамалар мол Қазталов – республиканың ең шалғай аудандарының бірі. Шал­ғай ауданның мұңы да, мұқтажы да болмай тұрмайтыны бесенеден белгілі. Проблемалық мәсе­ле­лердің шешімін табуы ең  ал­ды­мен аудан экономикасын ілгері бастыру мен тұрғындардың әлеу­меттік-тұрмыстық деңгейін көте­ру ісінен бастау алмақ. Бұл ба­ғытта шұғыл қолға алынған іс-ша­раларға аудан жұртшылығы дән  риза екенін іссапар бары­сын­­да айқын аңғардық. Әрі Қазталов аймағында өркен жайған жаңа бастамаларға ауданның жаңа басшысы Табылғаш Сапаровтың ұйытқы болғанын да байқап қалғандаймыз. Гәп мынада. Қазталов өңірін­де газ, мұнай, кен өндіруге ба­ғыт­талған өндіріс орындары жоқ. Сондай-ақ, жартылай шөлейт ай­маққа орналасқан аудан жері егіс­тік салуға қолайсыз. Мұндай жағ­дайда жаңа жұмыс орында­рын ашу ісі де тұйыққа тіреле бермек. Дегенмен, жаңа басшы осынау жылжымастай көрінген істің де жөнін тапқан секілді. Пилоттық жобаны жеңіп алған Қазталов ауданына жүз миллион теңге қаражат бөлініпті. Осы ар­қылы кәсіпкерлікпен айналыс­қысы келетін тұрғындарды қар­жы­лық тұрғыдан қолдау тетігі жасалыпты. Яғни, аталған қара­жат кәсіпкерлікпен айналысуға белді бекем буған, бұл үшін арнайы әзірлік курсынан өткен адамдарға берілмек. Қазталов – облыстағы мал өсіруге қолайлы өңірлердің бірі. Мұндай мақсат­ты іске асырамын деушілерге де пилоттық жобаның шапағаты тимек. Сарыөзен мен Қараөзеннің қойнауында, бұрынғы екі аудан­ның ізінде қоныс тепкен Қаз­талов облыстағы толықтай газ өткізілген өңірлердің қатарына  кіреді. Алайда ауданның Жалпақ­тал округі аумағында табиғи газ құбыры тартылмаған Қарасу, Талдықұдық, Талдыапан және Көктерек ауылдары бар. Айталық Қарасуға Жаңақала ауданының Айдархан ауылынан көгілдір отын тарту жөнінде жобалау-сме­талық құжаттар әзірленген. Дәл бүгінгі күні жоғарыда аталған өзге ауылдарды көгілдір отынмен қамту мүмкіндігі болмай отыр­ғанын, ол алдағы жылдардың еншісіндегі іс екенін ашық айтуға тура келеді. Аудан тұрғындарын ауыз сумен қамту ісінде де кешенді шаралар іске асып келеді. Бұл мә­селе жөнінде үлкен қиындық­тар­ға тап болған Болашақ ауылының тұрғындары деуге болады. Атал­ған ауылға Сарыөзеннен су тарту жөнінде жобалау-сметалық құ­жат­тар жасалған. Бұған тиісті қаражат облыстық бюджеттен бөлінген. Ал мердігерлік жұмыс­тарды атқаруға  әрі жобаны то­лық аяғына дейін жеткізуге қа­жетті қаражатты республикалық бюджет есебінен қарастыру  көз­делген. Оның жалпы мөлшері – 550 миллион теңге. Сондай-ақ, ауданның бірқатар ауылдарында «Ақбұлақ» бағдар­ламасы бойынша бұрынғы су жүйелері тазартылып, таза су қондырғысы құрылыстары бас­тал­ған. Аймақта жер асты су көздері жеткілікті жерлер жоқ емес. Оған тиісті зерттеу жұмыс­тары жүргізілуде. Мұндай көрініс Тереңкөл ауылдық округіне тән. Сонымен бірге, жер асты су көздеріне мүлдем тапшы елді мекендер де баршылық. Арнайы жасалған геодезиялық картада соның бәрі көрініс тапқан. Тұрғындарды ауыз сумен қамту жөніндегі тактикалық және стратегиялық шешімдер де сол картаға сәйкес алынбақ. Яғни, жер асты су көздері жоқ мекендерге оны жеткізудің өзге жол­дары белгіленбек. Өмірден көргені мен көңілге түйгені мол, бүгінгі заман тыны­сы жөнінде де құнды ой-пікірлер айта алатын ақсақалдар Қазталов ауданында да аз емес. Аудан басшысы Т.Сапаров осы құнды­лықты бүгінгі күн талабына орайластыра алғаны, ардагерлер кеңесі мен ақсақалдар алқасының қызметін жаңаша мазмұнмен толық­тыруға бастама­шы бола білгені өз алдына бір бөлек әңгіме. Ауданда серпінді істердің қанат жаюына олардың қосқан үлестері қомақты. Соның бірі кең ауқымды абаттандыру жұмыс­тары. Аудан бюджетінде басы артық қаражат болмаған­дықтан, бұл істер негізінен қолда барды ұқыпты пайдалану, бірді екі ету, және дүркін-дүркін сенбіліктер ұйымдастыру арқылы жү­зеге асуда. Бір сөзбен айтқанда, бүгінде Қазталов ауданында соны серпіліс те, сілкініс те бар. Алға нақты міндеттер мен межелер қойыл­ған. Осыған дейінгі барлық жетістіктерді аудан жұртшылығы Елбасының сарабдал саясатымен байланыстырып отыр. Темір ҚҰСАЙЫН. Батыс Қазақстан облысы, Қазталов ауданы.