Cіз не дейсіз?

ҚЫСҚА ДАЙЫНДЫҚ БАЙЫПТЫ БАСТАЛДЫ Мемлекет басшысының би­ылғы Жолдауында тұр­ғын үй-коммуналдық шаруа­шы­лығын жаңғырту тап­сы­рылса, оны жүзеге асы­ру­дың тетіктері ай­қын­да­лып, бағдарлама ая­сын­да жұ­мыс жалғасқан. Мұ­ның өзі алдағы қысқа дайын­дық­қа да көп көмегін тигізетіні анық. 2011-2012 жылдардағы жы­лы­ту маусымына дайындыққа байланысты «Егемен Қазақ­стан­ның» Алматы облысындағы тілшісі Күмісжан Байжан облыстық энергетика және тұрғын үй-коммуналдық шаруашылық басқармасының бастығы Ызғарбек Бектұрсыновқа: – Сіз бұған не дейсіз? – Иә, құнды құжаттағы тап­сырма баршадан қолдау тапты, тиісті бағдарлама жасалды. Енді оны жүйелі жүзеге асыру қажет. Ал, қыраулы қыс айларында тұр­ғындардың әлеуметтік жағ­дай­ы­ның оң шешілуі әр шаңы­рақтағы жылу мен басқа да тұрмысқа қажеттіліктердің то­лық қамты­луы­на тікелей тәуелді. Биыл жылыту маусымына дай­ындыққа 12,7 млрд. теңге бө­лінді. Қазірдің өзінде 19,9 мың литр дизель отыны, 8,9 мың тонна мазут әзірленді. Сондай-ақ жылыту маусымына 910 білім, 839 денсаулық сақтау, 292 әлеу­меттік нысандарды дайындау қажеттігі кезек күтіп тұр. Қатты отынмен жанатын 33 қазандық, 20,5 шақырым жылу трассасы, 3 мың шақырымнан астам электр желілері, 373 ша­қырым су құбы­ры мен кәріздік желі, 844 тұрғын үй жөнделуге жататыны анық­талып, жұмыс жалғасуда. Осы орайда аудан, қала әкімдері, облыстық басқармалар мен шаруашылық жетекшілері бір­қатар міндеттерді жүзеге асы­руы керек. Тұрғын үй-ком­му­налдық шаруашылықты жаң­ғыр­ту бағдарламасына келсек, өңір­дегі 2020 жылға дейін жаң­ғыр­туды қажет ететін жүйе­лердің ұзындығы 22 мың ша­қырымды құрайды. Жүргізіле­тін жұмыс­тар арқасында күр­делі жөндеуді талап ететін кондоминимум ны­сандарының үле­сі 73%-дан 22-%-ға төмен­деуге тиіс. Қазіргі кезде тұрғын үй қатынас­тары­ның оңтайлы моделін құруды қамтамасыз ететін заң актілерін қабылдау ойлас­тырылуда. Өңірдегі тұрмысқа қолайлы тұрғын үй қорының көпшілігі күрделі немесе ағымдағы жөн­деуді қажет ететінін де айтқан жөн. Мемлекет халықаралық қар­жы институттары мен банктерді тарта отырып, жеке инвес­торларға, кәсіпорындар мен аза­мат­тарға тұрғын үйлер мен ком­муналдық нысандарды жөн­деу және қайта жаңарту үшін қар­жыландырудың арнайы тетіктерін ұсынуды жоспарлағаны белгілі. Облыс бойынша коммунал­дық инфрақұрылым желілері мен құрылғыларының техника­лық жағдайына келсек, оның көп бөлігі жөндеу мен ауыс­тыруды талап етеді. Көп пәтерлі тұрғын үйлердің техникалық жағдайы да мәз емес. 2011-2020 жылдары коммуналдық инфра­құрылымды жаңартуға барлық қаржыланды­ру көздерінен 125,6 млрд. теңге жұмсалуы тиіс. Көп пәтерлі тұрғын үйлерді жөн­деу­ді екі тетікпен жүзеге асыру көз­делсе, бұл жөнінде де бағ­дар­лама жаса­лып, біртіндеп жүзеге асыры­латынын айтқан жөн. Ал, алдағы қысқа дайын­дық­тың толық тиянағын келтіруге бай­ланысты жұмыс қызу бас­тал­ды. Өткен жылы тұрғын­дар­дан онша көп өкпе-наз айтыл­мады. Ендігі мақсат биыл да осындай жүйелі жұмысты жал­ғастыру үшін бар мүмкін­дік­терді жұмыл­дыру. Жетісулық­тар­дың үйі жылы, тұрмысы қолайлы болаты­нына күмән жоқ екенін айтқан жөн.