Тұрғын үй қорына түбегейлі өзгеріс қажет

Жамбыл облысындағы құры­лыс индустриясының өсіп-өркен­деуіне атсалысып жүрген компания басшылары облыс әкімі Қ. Бозымбаевтың ұсынысымен об­лыс орталығындағы көп қабатты тұрғын үйлердің аулаларын абат­тандыруға үлес қосып, көптеген тараздықтардың алғысын алған болатын. Енді, міне, мемлекеттік «Тұрғын үй-коммуналдық шаруа­шы­лығын жаңғырту» бағдар­ламасы бойынша тозығы жеткен тұрғын үй қорын жаңарту қолға алына бастады. Бүгін­де облыс орталығын­дағы осыдан жарты ғасырдан астам уақыт бұрын салынған көп қабатты үйлердің ескірген қас­беті мен шатырлары және инженерлік жүйесі жаңғыртылуда. Атап айтсақ, осы бағдарлама шең­­берінде биыл 92 үй мұнтаз­дай болмақ. Игілікті іске алғаш­қы траншпен 428 миллион теңге бөлініп те қойыпты. Тараз қаласының әкімі Б. Орын­бековтің айтуынша, тұрғын үй жәрдемақысы мен несие арқылы 11 үйге жөндеу жұмысы басталып кеткен. Оқырмандарға түсінікті болу үшін айта кетейік, бүгінде көп қабатты тұрғын үйлердің бәрі жеке меншікте екені белгілі. Сондықтан аталған бағдарламаға қатысу үшін кондоминимум құрып, тіркелген тұрғын­дарға мемлекет 7 жыл мерзімге өсімсіз несие береді. Ал оған тозығы жеткен тұрғын үйлерді тап-тұйнақтай етуге әбден бола­ды. Кондоминимумге бірігіп, тіркелген тұр­ғындарға мемлекет тарапынан өсімсіз несие беру сияқты игілікті іс науқандық акция емес, ол алдағы уақытта да тұрақты жалғасын таба бермек. Құрылыс және тұрғын үй-коммуналдық шаруашылығы істері агенттігінің төрағасы С. Нокин  облысқа келген жұмыс сапа­рын­да өңірде атқарылып жатқан осындай көптеген жақсы істермен танысты. «Жамбыл­мем­са­рап­та­ма» еншілес мемлекеттік кәсіпорынының әкім­ші­лік ғима­ратының ашылуына қа­тысты. Бұл жаңа ғимарат жоба­лар­ды мемлекеттік ведомстводан тыс  сараптау жүйесінің қызметін же­тіл­дірудің 3 жылға арналған бағ­дар­ламасы бойынша салыныпты. Мемлекеттік сараптама құры­лыс саласында маңызды орын ала­ды. Өйткені кез-келген құр­ы­лыс ны­са­нын сапалы жүргізіп жә­не мер­зімді уақытында тап­сыру үшін оның замана талабына сай жоба­лық-сметалық құжаты болуы қа­жет. Ал ондай жоба­ларды мұқият тексеріп, толық­ты­ратын жә­не жетілдіретін мемлекеттік сараптама қызмет­кер­лері. Бірақ, өкінішке қа­рай, сараптама қызметкерлерінің осы уа­қытқа дейін өз қарашаңы­рағы болмай келіпті. Бұл, әрине, сараптама сапасы­на кері  әсерін тигізетіні анық. Сон­дықтан облыс орта­лы­ғынан бой көтерген жаңа әрі зәу­лім мекеме сараптама сала­сын­да­ғы жа­ңа жобалар мен ұсы­ныс­­тар­дың ордасына айналады деп сенеміз. Көсемәлі СӘТТІБАЙҰЛЫ, Жамбыл облысы.