Мұңымызды кімге шағамыз?

Алматы облысының, Панфилов ауда­нын­дағы Қорғас ауылы осы аттас халық­аралық кеден бекетінің қасында орналас­қан. Сондықтан оны тоғыз жылдың тора­бын­да тұр деп айтуға болады. Бірақ, өкі­нішке қарай, осындай маңызды елді мекеннің әлеуметтік проблемалары әлі күнге дейін дұрыс шешім таба алмай келеді. Ең бастысы, біз таза ауыз суға зәруміз. Оны басы Қытай елінен басталатын Қорғас өзенінен аламыз. Ол су – ішуге жарамсыз. Сондықтан ауылдың қол  жеткен кейбір тұрғындары өздерінің құдық­тарын қазып алған. Ал енді біреулері оның бір тоннасын 1000-1500 теңгеге сатып алуға мәжбүр. Біздің Пиджим ауылдық округының әкімі осы мәселені шешпек болып, талай мемлекеттік орган­дарға ха­бар­ласты. Бірақ одан әзірге ешбір нәтиже шықпай отыр. Электр қуатымен қамту ісінде де осындай олқылықтар бар. Оның күші жеткіліксіз болғандықтан, ауыл халқы теледидар хабарларын дұрыстап көре алмай отыр.  Осындай жағдайда тұрмысқа қа­жетті шаң сорғыш, кір жуғыш мәшине, компьютер секілді құралдармен жұмыс істеу мүлде мүмкін емес. Былайша айтқанда, Қазақстан халықтарының бәріне де ортақ өркениет жетістіктерінен құралақан қалып отырмыз. Шындап келгенде, мұндай мәселелерді шешу қазіргі күні Үкіметке, жергілікті билік органдарына көп қиындық тудыр­май­ды. Оның жолын ең алдымен Елбасы­мыз­дың өзі халыққа арнаған Жолдауында көрсетіп берген жоқ па еді. Тіпті, «Ауыз су» бағдарламасының қабылданғаны қа­шан. Бірақ, өкінішке қарай, осы жақсы­лық­тар тоғыз жолдың торабындағы, атақ­ты халықаралық кеден бекетінің қасын­дағы бізге жетпей отыр. Мұндай өрес­кел­дікке бір жағынан  таңқалуға да болады. Сон­дықтан Үкіметтен, жергілікті билік орын­дарынан аталған мәселенің жеделдетіп шешім табуын сұраймыз. А.МӘУЛЕНБЕРДИНА, О.ФАТКУЛЛИНА, Ж.ТАРАЛБАЕВ, Н.ҮМБЕТБЕКОВ, шағым хатқа барлығы 60 адам қол қойған. Алматы облысы, Панфилов ауданы, Қорғас ауылы.