«Әлеуметтік медициналық сақтандыру қоры» КеАҚ Нұр-Сұлтан қаласы бойынша филиалы мамандарының хабарлауынша, елордада орналасқан Кардиохирургия орталығына Қазақстанның кез келген аймағынан науқастар портал, квота арқылы түсе алады. Оған ешқандай шектеу жоқ. Ота кезегінде тұрған науқастар кезегін шамамен 1 айдай ғана күтеді.
«МӘМС аясында ота жасатқысы келетін науқастардан міндетті түрде ЭКГ, ЭХОКГ, Холтер монитор ЭКГ, жедел жәрдем кезіндегі ЭКГ сұралады. Осы тексерулерден кейн біздің орталықта аритмологтың кеңесі қажет. Маман кеңесін алу үшін байланыс орталығына хабарласып, алдын ала жазылған жөн», дейді Ұлттық ғылыми кардиохирургия орталығының интервенциялық аритмология бөлімшесінің меңгерушісі, медицина ғылымдарының докторы, қауымдастырылған профессор, Қазақ аритмологтар қоғамының президенті Аян Әбдірахманов.
Біраз уақыт бұрын гипертрофиялық кардиомиопатия диагнозымен түскен науқасқа Кардиохирургия орталығының дәрігерлері Қазақстанда және Орталық Азияда алғаш рет тері астына қойылатын кардиовертер-дефибриллятор аппаратын қойды (S-ICD - subcutaneous implantable cardioverter-defibrillator). Бұл аппараттың ерекшелігі мүлдем қан-тамыр жүйесіне еңгізілмейді, сонымен қатар тері астында тұрып кенеттен болатын жүрек өлімінен құтқарады. Жаңа жоғары технологиялық қызмет түріне жататын бұл ота Кардиохирургия орталығының күшімен жасалды.
«Тағы бір ерекше мысал: науқас 36 жаста, диагнозы – толық 3 санатты АВ-блокада. Бірнеше рет электрокардиостимулятор ауыстырылған, бірақ қан-тамыр мен жүрек ішіндегі электродтары қала берген. Біздің орталыққа түскенде стимулятордың орны іріңдеп, сепсис болған. Бұл жағдайда барлық іштегі импланттарды алу қажет, іштегі электродтар тамырмен - жүрекпен бітіп кеткен. Оны алу науқастың өміріне өте күрделі, бірақ алмасқа амал жоқ. Іштегі электродтардың бәрін алып, орнына ТМД мемлекеттері ішінде алғашқы болып 2017 жылдың 22 тамызында электродсыз дүние жүзіндегі ең кішкентай Micra стимуляторын орнаттық. Қазір науқастың жағдайы жақсы, жылына 1 рет бақылауға келіп тұрады», деп еске алады А.Әбдірахманов.
Қазір Кардиохирургия орталығында жүрек ырғағының бұзылуына қатысты барлық заманауи жоғарғы технологиялық отаны жасауға мүмкіншілік бар. Білікті дәрігерлер үшін тіпті жаңа туған нәрестелерге де ота жасау – қалыпты жайт.
«Жүрек ырғағының бұзылуы көбіне жүрек ақауы, ишемия, қан қысымының көтерілуі, т.б. жүрек ауруларының себебінен болады. Сондықтан мүмкіндігінше спортпен айналысу, диета ұстану, майлы тамақтан тежелу, артық салмақтан арылудың жолын іздеу қажет. Жүрек ауруларының алдын алу – саламатты өмір сүруге байланысты» деп кеңес береді мамандар.
