Қазақстандық жанкүйерлер фристайлшы Юлия Галышеваның жарыс жолына шығуын тағатсыздана күтіп, конькимен жүгіруші Надежда Морозованың да жолына сондай үлкен үмітпен қарады. Себебі отандасымыз бірер күн бұрын 3000 метр қашықтықта 30 спортшының ішінде 13-орынға тұрақтап, бәсекеден кейін БАҚ өкілдеріне берген сұхбатында бар күшін 1500 метр қашықтықтағы жарысқа салатынын және міндетті түрде бір жүлде болатынын айтқан. «Бұдан да жақсы, бұдан да жылдам нәтиже көрсеткім келеді. Енді бар күшімді 1500 метр қашықтықтағы жарысқа саламын. Бейжіңдегі мұз айдыны біз үшін ыңғайлы. Қазақстанға медаль әкелетініме 100 пайыз сенімдімін», деді Надежда Морозова жарыстан кейін.
Надежданың бұлай сенімді сөйлеуіне де негіз бар еді. Өйткені 1500 метр – оның оң жамбасына келетін қашықтық. Мәселен, ол былтыр қараша айында Әлем кубогі жарысының Польшадағы кезеңінде 1500 метрді 01:56.92 уақытта бағындырып, үздік үштіктің қатарынан көрінді. Бірінші және екінші орын алған жапониялық Михо Такаги мен Ақш өкілі Боуи Бриттани бұл қашықтықты 01:56.00 және 01:56.60 уақыт көрсеткішімен басып өткен болатын.
Морозова кешегі бәсекеде жоғарыдағы нәтижесін сәл жақсартқанымен, үздік үштік былай тұрсын, ТОП-10 спортшының қатарынан да көріне алмады. Бейжіңдегі «Ұлттық конькимен жүгіру» спорт кешенінде өткен жарыста Надежда Морозова 01:56.85 уақыт көрсеткішімен 14-орынға тұрақтады. Ал ту ұстаушы Екатерина Айдова бұл қашықтықты 1:59.01 уақытта жүріп өтіп, жарысты 18-орынмен аяқтады.
1500 метр қашықтыққа жарысуда Олимпиада рекордын жаңартқан Нидерланд өкілі Ирен Вюст топ жарды. Оның уақыт көрсеткіші – 1:53.28. Бұл – оның Олимпия ойындарындағы алтыншы алтын медалі. Ал 1500 метрдегі үшінші бас жүлдесі. Күміс жүлдені жапониялық Миха Такаги (1:53.72) иеленсе, үздік үштікті тағы бір Нидерланд спортшысы Антуанетте де Йонг (1:54.82) түйіндеді.
Биатлоншылардың жекелей бәсекесінде ел намысын қорғаған Галина Вишневская-Шепоренко үздіктер қатарынан көріне алмады. Жерлесіміз 15 шақырымдық жарыстың төрт оқ ату сәтінде бір ғана қателік жіберсе де, жалпы есепте небәрі 44-орыннан көрінді. Бір айта кетерлігі, Галина Вишневская биылғы биатлон маусымында нысана көздеуден тәуір нәтиже көрсетіп келеді. Алайда оның жылдамдығы өзге спортшылардан кемшін түсіп жатыр. Егер алдағы уақытта жылдамдығын арттыруға жұмыс істесе, Әлем кубогі жарыстарында жоғары орындардан көрінуі әбден мүмкін.
Галина жекелей жарыстың жеңімпазы, Сочи Олимпиадасының эстафетадағы чемпионы германиялық Дениз Херрманнан 5 минут 04 секунд қалып қойды. Херрман да оқ ату сәтінде бір мәрте қателесті. Франциялық Анаис Шевалье-Буше күміспен күптелсе, норвегиялық Марте Олсбю-Ройселанн қола жүлдегер атанды.
Шаңғы қоссайысынан екінші ресми жаттығуының үшінші кезеңіне қатысқан Шыңғыс Ракпаров 87,5 метрге секіріп, нәтижесін біршама жақсартып алды. Мұның алдындағы жаттығуларда ол 68 және 87 метрге секірген еді. Бір айта кетерлігі, Шыңғыс Ракпаров Қазақстан құрамасы үшін шаңғы қоссайысынан тарихи жолдаманы жеңіп алған болатын. Бұған дейінгі Олимпия ойындарында бірде-бір отандасымыз бұл спорт түрінен сынға түспеген еді.
Сонымен қатар бесінші жарыс күнінде шаңғыдан Қазақстанның ерлер және әйелдер құрамасы іріктеу сайыстарына қатысып, алғашқы 30 спортшының қатарына іліге алмай, жанкүйерлер алдында ұятты болды. Ерлер арасындағы жарысты Евгений Величко 62-ші, Виталий Пухкало 66-шы орынмен аяқтады.
Әйелдер бәсекесінде қазақстандықтар сапынан ең жоғары нәтижені Надежда Степашкина тіркеді. Ол жарысты 51-ші болып аяқтады. Ал Ангелина Шурыга – 60, Ксения Шалыгина – 67 және Ирина Быкова 68-ші сатыға тұрақтады. Жарыс ережесі бойынша бәсекенің ширек финалына мәрені алғаш болып кескен 30 спортшы жолдама алады.
Ерлер арасындағы биатлоннан 20 шақырымдық жекелей жарыста да жерлестерміз үздік нәтижесімен көзге түсе алмады. 29 жастағы Владислав Киреев төрт оқ ату айлағында бірде-бір қателікке бой алдырмаса да, жылдамдығының нашарлығына байланысты мәре сызығын 25-ші болып кесті. Ол жарыс жеңімпазы франциялық Фийон Майеден 3 минут 41 секундқа қалып қойды. Ал Александр Мухин оқ ату сәтінде төрт рет қателесіп, мәреге 52-ші болып жетті.
Бұл жарыста франциялық Фийон Майенің бағы жанды. Ол 20 шақырымды 48:47 уақытта бағындырып, Олимпиада чемпионы атанды. Беларусь өкілі Антон Смольский екінші орынға табан тіреді. Үшінші сатыға екі дүркін Олимпиада чемпионы норвегиялық Йоханнес Тиннес Бе жайғасты.
