ӨЗ ЕЛІМ-АУ, ӨРЕЛІ!

“ЭКСПО – Шанхай-2010” Дүниежүзілік көрмесін қызық­тау­шы­лардың көңілін арбап, көз құмарын қандырған Қазақстан жетістіктері көрме мазмұнын байытуда. Жай көрме емес. Жаһан жүрегі лүпілдеп шыдамсыздана күткен кере­мет көрме. Міне, Шанхайдың шырайын ашқанына да айдан сәл асыпты. Ағылған жұрт нөпірі. Қиыр-қияннан да қимасын аңсап келгендей туристердің жол шығынына едәуір жеңілдіктер жасалыпты. Қайткенде де Шанхайға жан баласын мейлінше көп жұмылдыру діттелген. Көрмені жарты жыл ішінде 100 миллионнан астам адам тамашаламақ. Қазақстан да молынан дәмелі, 8 миллиондай адамға қызмет етпек. Ұқсастық па әлде ұлы істердің өзе­гінде ұлағат дәні сәтімен ұрық­танып жататындай ма, сірә! Ұр­ым­талы солай болған, бәлкім. Есілдің сол жағалауындағы Астанадай ажар­лы боп, Хуанпу өзенінің сол иінінде Қазақстанның ұлттық павильоны көркейіп, көсіліп жайғасқан. Есіл мен Хуанпу толқындары кезектесе қақ­пақылдап тулатқан Қазақстан туы, мұнда да асқақ желбірейді. Жа­нарды суырғанда, “Өз елім-ау, өре­лі!” деп толғанып, жүректі шым ет­кі­зер... Ал сырт көз тамсанып, таң­ырқап жатқанда “Басқа қонған бақ құсы жер талғамай ұша берсінші” – деген ақ тілек кеудені ысытады. Жақсыны көрмекке ықылас кү­шейген. Бастапқы бір ай ішінде, алға­шында күніне 2 мыңдай адам, орта шенінде 3-4 мыңдай кісі келіп, ал маусым туғалы бері бұл сан 4,5 мың адамға көбейген. Осы қарқын сақталса, көрме аяқталатын 31 қа­занда 8 миллиондай қызықтау­шы­ның есебі тіркелмек екен. Бұл – Қазақ елі үшін зор абырой. Бірқатар Қазақстан делегациясы арнайы сапармен келіп, ұлттық па­вильонды өздерінің қытайлық әріп­тестерімен бірлесіп тамашалады. Мы­салы, төраға Ә.Шаяхметов бас­та­ған ҚР Ұлттық қауіпсіздік коми­те­тінің, Е.Нығматулиннің жетек­ші­лігімен Парламент Сенатының, Р.Сәр­сенбаева бастаған Қазақстан әйелдері делегацияларының ұлттық экспозициялар жөніндегі пікірі өте жоғары. Сондай-ақ Шанхай ын­ты­мақтастық ұйымына мүше мемле­кет­терден 28 өкіл, Ресей Мемле­кет­тік думасы коммунистер фрак­ция­сының жетекшісі Г.Зюгановтың арнайы тобы Қазақстанның ұлттық павильонында болып, тәуелсіз мем­лекетіміздің бүгінгі жетістігімен және болашақ көкжиегімен таныс­ты. Қазақ елінің қала салу, оның адам игілігіне ыңғайлы да сапалы қызмет ету мүмкіндіктерін жоғары бағалады. – Құрылысшы болғандықтан, Қазақстанның құрылыс индустрия­сының әу-жайын байқамақ едім, – дейді Уан Ши Ми. – Әбден тәнті етті. Заманауи технологиялар мен жабдықтардың кейбірі өзіме таңсық. Ондай мүмкіндіктерсіз күшті мем­лекеттің жаңа астанасын жайнатып салу түске кірмейтін іс қой. Көр­ме­нің ғибраты мол. Ой­лан­тады. Ма­ман­дығыңды жетіл­ді­руге септеседі. Шанхайлық тұрғын Литя Шмо Минзяның зор әсерге бөленгені жымиған жүзінен сезілетіндей. Оны Астана мен Алматы қалаларының ірі мегаполиске айналу сатылары қызықтырады екен. Әрине, Шан­хай­дың даму жолы ерен. Әлемнің үшінші шаһары болып есепте­ле­тін­діктен, оның иығына түскен жүк зіл-батпан. “Тамаша қала – тамаша өмір” қа­ғидаттары бұл қалаға сон­шалықты тән. Астанаға да сондай құтты қа­дам тілейміз, деді ол жү­рекжарды сөзінде. ҚР Мемлекеттік сыйлығының лауреаты, Қазақстанның халық әр­ті­сі, “Қазақ әуендері” АҚ “Қазақ­кон­церт” өнер ұжымының дирек­то­ры Алтынбек Қоразбаевтың көрме аймақтарын аралағандағы әсері де шексіз екен. – Мен мұнда қала өмірін жақ­сартуға, инфрақұрылымды да­мы­ту­ға, оның ішінде инновацияны пай­далану, экологияны сақтау секілді мә­селелерге қатысты жобаларға ден қой­дым, – деді өнер иесі. – Бұл са­ладағы үрдісті істеріміз сапалан­бақ екен. Алматының экологиясы алаңдататындықтан да шығар, өзге мемлекеттердің павильондарына бас сұқтым. Сондағы түйгенім – бәрі адамның пиғылы мен ықыласына келіп тіреледі екен. Ертең, 5 маусымда “ЭКСПО – Шанхай-2010” Дүниежүзілік көр­ме­сінде Қазақстан Республикасының Ұлттық күні аталып өтеді. Демек, тәу­елсіз Қазақстанға жалпақ жұрт­тың назары айрықша ауатын бо­ла­ды. Өрелі елің болса, халқының өр­кені өсер! Ләйім, жасампаздыққа жазсын! Қайсар ӘЛІМ – Шанхайдан.