БІЛІМНІҢ ЖАҢА БЕЛЕСІНЕ

Алматыда еліміздің білім беру жүйесін дамытудың 2011-2020 жылдарға арналған мемлекеттік бағдарламасының жобасын талқылаған кеңес болып өтті. Жиында Білім және ғылым министрі Жансейіт Түймебаев бұл жобаның республиканың білім беру жүйесінде осыншалықты ұзақ мерзімге арналған бірінші страте­гия­лық құжат екендігін атап көр­сетті. Білім беруді дамытудың 2011-2020 жылдарға арналған мемлекеттік бағдарламасы білім берудің бүкіл жүйесін жетілдіре жаңаландыруды көздейді. Ол жаңашылдық үдерістері қаржы­лан­­дыру саласын да, сондай-ақ мұ­ғалімнің мәртебесін көтеруге, басқаруға, ақпараттандыруға, білім мазмұнына байланысты толып жатқан басқа мәселелерді де қамтиды. Айталық, білім беруді қаржы­лан­дырудың жаңа тетіктерін әзір­леу педагог біліктілігін көтеру ісіне ваучерлік қаржыландыруды енгізуді қарастырады. Бағдарлама қабылданғаннан кейін мұғалімдер өзінің кәсіби деңгейін жетілдіретін оқу немесе ғылым мекемесін өздері таңдайды. Мұғалім мамандығының мәр­те­бесін көтеру жайына келсек, Ж.Түй­мебаев бұл орайда педагог­тар­дың орташа жалақысын еліміз­дегі орта жалақы деңгейіне жеткізу жоспарланып отырған­ды­ғын мә­лім етті. Сондай-ақ оқы­ту ке­зінде ағылшын тілін пай­далана­тын пән мұғалім­де­рінің санын кө­бейту көзделуде. 2015 жылға дей­ін олар­ды мұға­лімдердің жал­пы санының 15 пайызына, 2020 жыл­ға қарай 30 пайызына дейін жет­кізу жоспар­ланып отыр. Министр Қазақстан Прези­ден­ті Нұрсұлтан Назарбаевтың қа­тысуымен өткен кешегі Шетел ин­весторлары кеңесінің отыры­сын­да соңғы 15 жылда қазақ­стан­­дық рынокта әлемнің ең белгілі компаниялары белсенді жұ­мыс істеп жатқандығы айтыл­ғандығын еске салды. Бірақ олар дәл бүгінгі күнге дейін кадр мә­селесінде үлкен қиыншылық­тарды бастан кешіруде. Өкінішке орай, біздің жоғары оқу ор­ын­дарымыздың, кәсіптік лицейлер мен колледж­де­ріміздің көпшілігі оларды халық­аралық стандарт­тарға жауап бере алатын дең­гей­дегі мамандармен қамтамасыз етер­лік жағдайда емес. Бұл жай­ларды Ж.Түймебаев қынжыла тіл­ге тиек етті. Білім беруді дамытудың 2011-2020 жылдарға арналған мемле­кеттік бағдарламасының жобасы кеңесте келелі талқыға түскеннен кейін Білім және ғылым министрі жиынға қатысқан барлық жоо-лардың, облыстық және аудандық оқу бөлімдерінің басшыларын, атақты ғалымдар мен жаңашыл ұстаздарды осынау құжатты өз ұжымдарында талқылап, оны жақсарту үшін нақты ұсыныстар беруге шақырды. Министрдің сө­зіне жүгінсек, білім беру саласын дамыту жалпы қоғамды дамыту деген сөз. Сондықтан, талқылау не­ғұрлым салиқалы болса, жаңа бағдарлама қоғамның арман-үмітіне соғұрлым сай келіп, жас ұрпақты білімнің жаңа белесіне жетелемек. Қорғанбек АМАНЖОЛ.