АСТАНА – ЖАҢА МҮМКІНДІКТЕР ҚАЛАСЫ

Кеше Астанадағы Тәуелсіздік сарайында “ASTANAІNVEST 2010” 1 халықаралық инвестициялық форумы болып өтті. Оның басты мақсаты – еліміз астанасындағы қолайлы инвестициялық ахуалды одан әрі дамыта түсу, қала экономикасына отандық және шетелдік инвестиция құйылуын ынталандыру мен Қазақстанның әлемдегі бәсекеге қабілетті 50 ел қатарына кіру стратегиясы шеңберінде “Астана – Қазақстан елордасы” брендін қалыптастырып, оны әлемдік рынокта кеңінен таныстыру болып отыр. Форумға Премьер-Министр Кәрім Мәсімов, Астана қаласы­ның әкімі Иманғали Тасмағам­бе­тов, “Самұрық-Қазына” ұлттық әл-ауқат қоры” АҚ басқарма төр­ағасы Қайрат Келімбетов, Индус­трия және жаңа технологиялар министрі Әсет Исекешев, Эконо­ми­калық даму және сауда ми­нистрі Жанар Айтжанова, “Lіor Corporatіon” компаниясының президенті Давид Бен Нани, “CEO Mіllenіum Fіnance Corporatіon” басқарма төрағасы Кеба Кеинде қа­тысты. Форумды Үкімет бас­шы­сы Кәрім Мәсімов ашты. Бүгінгі таңда елімізбен бірге Астана қа­ла­сы да маңызды уақытты бастан кешіруде, деп бастады сөзін Пре­мьер-Министр. Әлем елдері де, Қазақстан да сындарлы дағдарыс­тық кезең мен одан кейінгі кезеңге өту арасында тұрғандығы барша­мызға мәлім. Елбасымыздың басшылығымен кесімді де батыл шешімдер қабылданып, соның нәтижесінде қиын кезеңдерден қатты шығынданбай өттік. Оған қоса биылғы жылдың алғашқы 5 айының қорытындысын алып қарасақ, дер кезінде қабылданған шешімдердің дұрыстығына тағы бір рет көз жеткіземіз. Ендігі ке­зектегі маңызды нәрсе – Елбасы Жолдауындағы тапсырмалар айқындағандай, ел дамуының жаңа саты­сына көтерілу болып отыр. Сондықтан кәсіпкерлік белсен­ді­лік, ішкі және сыртқы инвестор­лар­ды экономиканы одан әрі да­мыту ісіне тарту жұмыстары ал­ғаш­қы кезекте тұр. Астана – тәуелсіздігіміздің символы, даму­дың локомотиві ретінде инвес­тиция тартудың, оған қолайлы жағдайлар жасаудың үлгісін алғашқы болып көрсетуі тиіс. Қала аумағында соңғы технологиялық өндіріс орындары қалыптасуда. Мысалы, “Дженерал электрик” компаниясымен бірлескен зауыт салу шетелдік инвестиция тарту­дағы жарқын көрсеткіштеріміздің бірі. Сондай-ақ жақында Алматыда өткен форумдардың бірінде тағы да шетелдік әріптестерімізбен жоғары технологиялық өндірістер бойынша бірнеше келісім-шарт­тарға қол жеткіздік. Бұл өндіріс орындары Астана аумағында салынатын болады, деп атап өтті Премьер-Министр. Кәрім Мәсі­мов­тің айтуынша, беріліп отырған мүмкіндіктер, қолайлы жағдайлар нәтижесінде, сондай-ақ осындай басқосулардың сенім тудыруы ар­қылы болашақта Астана еліміздің өзге қалалары мен басшыларына әбден үлгі бола алады. Одан соң сөз алған қала бас­шысы Иманғали Тасмағамбетов Астана төрінде бүгін тағы бір жарқын бастаманың қолға алынып отырғандығын, “Астана Инвест” халықаралық инвестициялық форумы бұл тұңғыш өткізіліп отырған шара екендігін айтып өтті. Аталған форумның бола­шағы зор екендігіне күмән жоқ. Себебі бұл әлем елдерінің маң­дай­­алды мамандары, кәсіпкерлер мен бизнес өкілдері, банк бас­шылары мен қаржы институты жетекшілері басқосқан әмбебап жиын. И.Тасмағамбетовтің ай­туынша, соңғы 10 жылда ЖҚӨ көлемі 50 есе өскен. ІЖӨ-дегі Астана үлесі 1,5-тен 10 пайызға дейін жетіп, өнеркәсіп өндірісі 7 есеге дейін ұлғайған. Ал астана көшірілгелі бері мұнда тартылған инвестиция көлемінің өсуі 22 есеге жеткен. Бұл бәсекеге қабі­летті ресурс және қаламыздың сенімділіктің көлемді қоры бар құнды активі болып табылады. Дегенмен тәуекел де жоқ емес. Белгілі экономист Еуропа орта­лық банкінің басшысы Жан-Клод Тришенің айтуынша жаһандық экономикалық дағдарыста тек дамушы елдер ғана өсу көрсет­кішін көрсеткен. Сондай-ақ оған тән тағы бір сипат, дамыған ел­дердің төтеп бере алмай, кері­сінше дамушы елдер әлемдік эко­номика үшін қуат көзі болып табылғандығы. Бұл жас эконо­миканың өсу деңгейіне шығу фазасында қалыпқа келу әлеуеті тез екендігінің куәсі. Егер Астана экономикасын алып қарасақ, ондағы тәуекел мүмкіншілігін азайтатын, оны қорғайтын құрал оның құрылымы болып табыла­ды. Ал оның көп бөлігін биз­нестің жұмылғыш түрі – шағын және орта кәсіпкерлік құрайды, деді қала басшысы. Осылайша елорданың даму көрсеткіштерін атаған қала әкімі қаланың инвестициялық тартым­дылығының сыры неде екендігіне тоқталды. Елбасымыздың “Аста­на – жаңа қала” арнайы эконо­микалық аймағын құруы дамудың алғышарты болды. Оған қаланың 6 мың гектар жерін қамтитын, 977 млрд. теңге инвестициялық қоры бар 256 нысан кіреді. Оның 557 млрд. теңгесі немесе жарты­сынан көбі жеке инвесторларға тиесілі. Осындай зор әлеует ин­весторларға “салық жеңілдіктері, кедендік жеңілдіктер мен қосым­ша тегін жер” тиімді формула­сы­ның жемістілігін тағы бір рет дәлелдейді. Аймақтағы қолжетім­ділік, еңбек ресурстары, жаңа ин­дустриялық жобаларға салынған инвестицияларға көрсетілетін мемлекеттік қолдаулар инвести­ция құюшылар үшін тамаша мүмкіндіктер ашады. Кез келген қарқынды дамып келе жатқан қала секілді Астана да үлкен қаржы құюды талап етеді. Бүгінде елорданың инвестициялық әлеуе­тін аша түсуге қажетті жағдай да, мүмкіндіктер де бар. Бүгінгі көр­меде бірлесе жүзеге асыруға дайын 115 жоба қойылып отыр, деді қала басшысы. Оның айтуынша, жуық арада құрылыс саласындағы жо­баларды жүзеге асыратын ин­весторлар қосымша жеңілдіктер мен преференциялар алатын болады. Олардың ішінде ҚҚС, жер салығы мен мүлік салығына нөлдік үстеме болады, деп нақтылай түсті инвестициялау артықшылықтарын И.Тасмағам­бетов. Форум шеңберінде өнеркәсіп, құрылыс, мемлекет пен жеке мен­шік серіктестігі тақырыбында сессиялар мен дөңгелек үстелдер өтті. Оларда Астанадағы құрылыс саласының болашағы мен қарқы­ны, өңдеуші өнеркәсіп саласына мемлекет тарапынан көмек шара­лары және мемлекеттік үдемелі индустриялық-инновациялық даму бағдарламасы талқыланды. Форумға Ресей, Еуропа, АҚШ, Оңтүстік-Шығыс Азия мен Парсы шығанағы елдерінен үздік қаржы сарапшылары мен бизнес-элита өкілдері, сондай-ақ елордадағы ұлттық компаниялар мен қаржы институттары – барлығы 700-ден астам делегат қатысты. Венера ТҮГЕЛБАЙ.