БАП ШАБА МА, БАҚ ШАБА МА?..

ҰБТ: НӘТИЖЕ ҚАНДАЙ? Өткен апта соңында республика бойынша биылғы мектеп бітірген түлектердің бағын сынайтын Ұлттық бірыңғай тестілеу сынағы басталған-ды. Осынау маңызды науқан басталар алдында Білім және ғылым министрі Жансейіт Түймебаев Алматыдағы Қаныш Сәтбаев атындағы ҚазҰТУ-дегі тестілеу пунктінде болып, ата-аналар, БАҚ өкілдерімен кездесіп, түлектерге сәттілік тіледі. Құзырлы министрліктің мә­ліметі бойынша, 2010 жылғы мектеп бітіруші 138 162 баланың 110 118-і ҰБТ тапсыруға өтініш білдірсе, тестілеу маусымның 4-10-ы аралығында 154 пунктте (49 қала мен 105 аудан орталығы) өткізілуде. Тест тапсырушы түлектер барлығы жеті лекке бөлінген. Биыл бір лектегі оқушылар саны 800-ге дейін азайтылды. Бұл ҰБТ-ны неғұрлым ыңғайлы жағдайда тапсыруға мүмкіндік береді. ҰБТ 5 пән бойынша: оқыту тілі (қазақ немесе орыс), Қазақстан та­рихы, математика, таңдау пәні, сондай-ақ орыс тілінде оқытатын мектептердегі – қазақ тілі, қазақ тіл­ді мектептердегі - орыс тілі пән­дері бойынша өткізілуде. Әрбір пән бойынша тест тапсыр­ма­ларының саны – 25, ал бес пән бо­йынша бар­лығы – 125 сұрақ. Тес­тілеу уа­қыты – 210 минут, яғни 3,5 сағат. Биылғы жылғы мектеп бітіру­ші­лер мемлекеттік грант конкурсына қатысу және республиканың жо­ғары оқу орындарына ақылы не­гіз­де оқуға түсу үшін кем дегенде 50 балл (“Жалпы медицина” ма­ман­дығы үшін - 55 балл) жинауы тиіс. ҰБТ-ның балын аттестаттың ба­ғасына ауыстыру шкаласы өзгер­ген. Егер мектеп бітіруші бір пән­нен 0-3 балл жинаса –“қана­ғат­тана­рлықсыз”, ал 4 және одан жоғары алса, оңды көрсеткіш болып табылады. “Мемлекеттік құпиялар туралы” ҚР-ның Заңына сәйкес дұрыс жауаптар коды мем­лекеттік құпиялар қатарына жатқызылған. Тест тапсырмаларын бағалау кезінде бірыңғай талаптарды сақтау және даулы мәселелерді шешу, ҰБТ-ға қатысушылардың құқық­тарын қорғау мақсатында респуб­ли­калық комиссия және әрбір ҰБТ-ны өткізу пунктінде апел­ля­ция­лық комиссия құрылған. Тап­сыр­малардың мазмұны және тех­ни­калық себептерге байланысты өті­ніштер тестілеудің қорытындысы шық­қаннан кейін келесі күнгі сағат 13.00-ге дейін қабылданады. Ұлттық мектептердің бітіру­ші­лері (ұйғыр, өзбек, тәжік) қал­ау­ла­ры бойынша ҰБТ-ны мемлекеттік немесе орыс тілінде тапсыра алады. ҰБТ-ны өткізу кезеңінде об­лыстардың, Астана және Алматы қалалары білім басқармаларының жанында ҰБТ-ның өткізілу бары­сын бақылауды қамтамасыз ететін штаб­тар құрылып, олардың жұ­мы­сын Білім және ғылым ми­нис­тр­лі­гі­нің жанындағы республикалық штаб үйлестіруде. Министрдің айтуынша, биылғы сынаққа дайындық сақадай-сай, өз деңгейінде жүргізілген. Өткен жылдардағыдай қателіктерге жол бермеудің барлық амал-шарғылары жасалған. Дайын жауап сататын, заңсыз шаруалармен айна­лы­са­тындар болса, бірден мемлекеттік органдарға хабарланып, қыл­мыстық жауапқа тартылады. – Бүгін міне, көріп отыр­сыз­дар, абыр-сабыр ештеңе жоқ. Бар­лығы өз деңгейінде. “Бағам есептелмей қалды” деген сияқты сөз болмайды, бәрін компьютер тек­серіп, сканерден өткізеді. Сон­дықтан ата-аналар, сіздердің қо­бал­жып отырғандарыңызды білеміз, бірақ еш уайымдаудың реті жоқ. Барлығы әділетті, әрі өз деңгейінде өтеді, – деп еліміздің бас мұғалімі абыржып отырған ата-аналарға басу айтты. Тестің әділ өтуіне ата-аналар да бір ауыздан шүбә келтірмейтінін жет­кізді. Өйткені, Қ.Сәтбаев атын­дағы ҚазҰТУ-дегі тестілеу пунк­тінде ата-аналарға арналған арнайы камерасы бар бөлме бөлініпті. Онда олар бұрынғыдай далада алаңдап отырмай, ғимараттың ішіне кіріп, өз балаларының тесті қалай тап­сы­рып отырғандарын көздерімен көруге мүмкіндік алған. Оған ата-аналар: “Бұл өте жақсы болды. Өйткені, көшеде үш жарым сағат күткенде: “Балаларымыз қалай тапсырып жатыр екен, қиналып қалды ма екен?” деген сауалдар маза бермейтін еді. Енді олар дәл жа­нымызда отырғандай. Универ­си­тет­тің осындай жағдай жасағанына алғысымыз шексіз” десіп жатты. Сол күні Қ.Сәтбаев атындағы ҚазҰТУ-де Алматы қаласы, Же­тісу ауданының 18 мектебі және республикалық Б.Момышұлы атын­дағы әскери мектеп-ин­тер­нат­тың түлектері, яғни жалпы саны 585 түлек тестен өтті. Оның ішінде 312 қазақ, 273 орыс тобы бар. Сонымен түс ауа ата-аналардың да, сынақ тапсырушылардың да асыға күткен уақыты жетіп, сағат 15.00-де ҰБТ қорытындысы белгілі болса, Жетісу ауданы бойынша сынақ тапсырған түлектердің қол жеткізген нәтижесі 83 пайыз болып, “Алтын белгіден” үміткер 6 талапкердің төртеуінің ғана үміті ақталды. Гүлзейнеп СӘДІРҚЫЗЫ. КАТОНҚАРАҒАЙЛЫҚ ШӘКІРТТЕР ЕРЛЕДІ Катонқарағай  ауданының шәкірттері бұрындары да бірыңғай ұлттық тестілеуде жоғары білім мен бі­ліктіліктің нәтижесін көрсетіп келген. Ал биылғы көрсеткіштері тіпті бәрінен де асып түсті. Аудан бойынша  бірыңғай ұлттық тес­тілеуде 93,1 балл көрсетті. Бұл облысты былай қойып, еліміздегі үздік көрсеткіштердің бірі болатыны сөзсіз. Жамбыл ауылының оқушысы Ақерке Рамазанова – 124, катондық Айман Құрманғалиева – 123, үлкеннарындық Ерасыл Зайнулдин –119, Айжан Аман­жанова, Назерке Сұлтанғазина, Ақгүл Рақымбаева, Берік Шарипов, Балжан Сәдуова, басқа да бір топ талапты шәкірт 120 балл жинады. Бірыңғай  ұлттық тестілеуге қа­тыс­қан 386 оқушының барлығы енді алған білімінің жемісін көрмек. Айта кету керек, “Алтын бел­гіге” ұсынылған 18 оқушының 16-сы жоғары атақты қорғап шықты. Оңдасын ЕЛУБАЙ, Шығыс Қазақстан облысы. Биылғы ҰБТ-ның алғашқы сынағының бірі Тараз мемлекеттік университетінің ғимаратында өтті. Мұндағы ерекшелік, ауди­тория­ларға қойылған бейне­камералар арқылы университет сыртындағы үлкен экрандардан тест тапсырудың барысын көруге болады. Бұл жаңалық өз кезегінде оқушылардың ата-аналары мен ұстаздарының көңілінен шықты. –Жамбыл облысындағы ҰБТ-ны ұйымдастыру және өткізу бойынша мемлекеттік ко­миссияның жұмысындағы оңды құбылыстардың бірі – тест тап­сырудың ашықтығын қамтамасыз ететін электронды технологияны енгізуі болып табылады, – дейді Білім және ғылым минис­трлігінің осында арнайы келген өкілі С. Житейников. ҰБТ-ның алғашқы сынағына Тараз қаласындағы мектептердің 4024 түлегі қатысса, қалған оқушылар 8 және 10 маусым күндері болатын тесте бақтарын сынамақ. Әзірге, ҰБТ-ның облыс бойынша орташа көрсеткіші 82,3 балл болып тұр. Көсемәлі СӘТТІБАЙҰЛЫ,Жамбыл облысы. 125 БАЛЛ ИЕГЕРІ АСТАНАДА “Астана-Достық” білім беру орталығы 2003 жылы құрылған. Сол уақыттан бері мектеп бітіруші түлектерге қазақ тілі, Қазақстан тарихы, орыс тілі, математика, ағыл­шын тілі, жалпы тарих, гео­графия, химия, биология, физика пәндері бойынша ҰБТ-ге  дайын­дық курсын жүргізеді. Дайындық  мем­лекеттік және орыс тілдерінде жүргізіледі.  Осы дайындық курсы қо­рытындысының жылдан-жылға жемісін беріп келе жатқаны осы жылы тағы да дәлелденді. 4 мау­сымда өткен ҰБТ нә­ти­жесінде Астана қаласы бойынша “Астана-Достық” білім беру орталығында 300 мектеп бітіруші түлектер ішінен Сағындық Ғизат  125 балды қан­жығасына бай­лады. “Егемен-ақпарат”.