ЖАМБЫЛДА ЖАҚСЫ ІСТЕР КӨП

Кеше Премьер-Министр К.Мәсімовтің облыстағы жұмыс сапары одан әрі жалғасып, ең әуелі “Қазфосфат” минералды тыңайтқыштар зауытына келді. Өйткені өңірдің экономикасы мен әлеуметтік жүгін Жамбыл фосфоры көтеріп тұрғаны ақи­қат. “Қазфосфат” ЖШС деп қара­пайым ғана аталғанымен, өте үлкен бұл құрылымның ішін­де “Қаратау” мен Шолақтау тау-кен өңдеу кешендері, Жаңа Жам­был фосфор зауыты және “Минералды тыңайтқыштар” филиалдары бар. Елбасы Нұр­сұл­тан Назарбаев облысқа кезекті бір жұмыс сапары кезінде фосфор саласына баса мән беріп, “Жамбыл – фосфордың отаны” деген болатын. Сондықтан Үкімет басшы­сы­ның өңір экономикасының ты­ныс-тіршілігін фосфор са­ла­сы­нан бастауы орынды. ЖШС-ның бас директоры М.Ескендіровтің айтуынша, мұнда жылына 650 мың тонна өнім шығаратын күкірт қышқылы цехының құры­лысы қолға алынған. Ол келесі жылы наурыз айында пайда­ла­ну­ға берілмекші. Жобаның жалпы құны 12 миллиард теңге болса, соның 4 миллиарды зауыттың қаржысы. Инвесторлар, яғни HSBC, АТФ банктері мен “Қаз­фосфат” ЖШС Премьер-Ми­нистр мен облыс әкімі алдында жобаны қаржыландыруға бай­ланысты үшжақты меморандумға қол қойды. Жамбылдағы айта жүретін іргелі істің бірі – құс еті мен жұ­мыртқаны тереңдете өңдейтін ет-жұмыртқа бағытындағы жоғары технологиялық құс фабрикасы­ның құрылысы. Бұған неміс кәсіп­керлері де қызығушылық танытып отыр. Жоба құны – 6 миллиард теңге. Немістер құс шаруашылығына тән қалдықтар мен қоқыстарды өңдеп, кәдеге жа­рататын зауыттың да құры­лысын қолға аламыз дейді. Атап айтсақ, ондай қалдықтардан же­ңіл әрі берік “карбон” деп аталатын құрылыс материалын жасауға болады екен. Үкімет басшысы бұл жобаның да қол қойылуына қатысып, екі тарап кәсіпкерлеріне сәттілік тіледі. Амангелді газ кен орнының ашылуы кезінде облыс жұрт­шы­лығының еңсесін көтергені рас. Енді, міне, сол газ кенішінің арқасында тағы бір зауыт дүниеге ке­ліп отыр. Ол – Амангелді шикі мұнай зауыты. Мұнда жы­лына 200 мың тонна мұнай өнім­д­ері өндірілмек. Ол облыс ди­қан­да­рының арзан жанар-жағармайға деген сұранысын өтейді деп күтілуде. Облыс әкімі Қ.Бозым­баевтың айтуынша, елімізде ша­ғын мұнай зауыттары көп бол­ға­ны­мен, жам­былдық нұсқаның айы­рмашылығы – толық жүйелі, яғни мұнда түпкі өнімге қол жет­кізілмекші. Облыстың байырғы тұрғын­да­ры армандай әңгімелеп отыратын өндіріс орындарының бірі – жүнді алғашқы өңдеу фабрикасы еді. Рас, ол бүгінде кеңес өкіметі ке­зін­дегі беделінен айырылған. Де­генмен, Үкімет көңіл бөлсе, фабрика басындағылар қолға алса, баяғы дүрілдеген дәуірді қайта жасауға болғандай. Өйткені мұнда топс өндіру жобасын қолға алуға болады. Ол қолға алынып та кетті. Қазір сол үшін қондырғыларды рет­ке келтіру жұмыстары жүр­гізілуде. Өнім осы жылдың шілде айында шыға бастамақшы. Үкімет басшысы бұл жұмысқа да риза­шылығын білдірді. Ел байлығы ең алдымен – ха­лық. Сондықтан Елбасы да, Үкімет те халықтың денсаулығына, саламатты өмір салтына жоғары мән беріп келеді. Сондықтан болар, Үкімет басшысының келесі атбасын бұрған нысаны – облыс­тық қан құю орталығы болды. Нысан үстіміздегі жылдың жел­тоқ­сан айында пайдалануға беріл­мекші. Жаңа қан құю орталығы батыс пен шығыстың ең озық технологиясымен жабдықталмақ. Үкімет басшысы, сондай-ақ, облыстағы “Жол картасы” ая­сында қолға алынып жатқан жұ­мыстармен, Тараз металлургиялық зауыты, “Жасұлан” ЖШС, “Қос­ал­қы бөлшектер” АҚ, “Жамбыл өндірістік цемент компаниясы” ЖШС және тағы басқа да ком­паниялардың жобаларымен де танысты. Облыстағы жасөспірім­дер қылмысы жөніндегі кеңейтіл­ген кеңеске де қатысты. Тараз қаласындағы көп қабатты тұрғын үйлердің аулаларындағы көріктен­діру, көгеріштендіру жұмыстарын да арнайы барып көрді. Үкімет басшысы К.Мәсімов об­лыстағы мемлекеттік бағдарла­ма­лар бойынша атқарылуға тиісті тапсырмалардың барлығының да тиянақты орындалып жатқанына көңілі толып, өңірден риза­шылықпен аттанды. Көсемәлі СӘТІБАЙҰЛЫ, Жамбыл облысы.