ЖАҢАРҒАН АУЫЛ ЖАН ЖАДЫРАТТЫ

Сәрсенбінің сәтінде Қызылағаш ауылындағы 200 отбасы кең, жарық үйлердің кілтін алып, қуанды Биылғы наурыз айында тасқын­нан зардап шеккен қызылағаш­тықтардың басына түскен ауыртпа­лық баршамыздың есімізде. Содан бері үш айға жуық уақыт өтті. Осы аралықтағы қызылағаштықтардың көрген қиындығына жүрек сыздаса, қуанған сәттерін “алақайлап!” оқырман назарына ұсынып келеміз. Бұған дейін жаңа қонысқа ие болған 145 отбасы байыпты тірші­ліктерін жалғастырып, “өз үйім, өлең төсегім” деп аяқ созып, бейқам тірлік кешсе, олардың бұл өмірлеріне қызыққан ауылдастары “қашан үйіміз бітеді” деп құрылыс жұмыстарын көзден таса етпей, дегбірсіздік танытқаны анық. Сәрсенбінің сәтінде тұрғын­дардың көптен күткен қуанышты сәтінің орайы келді. Қызылағашқа табан тірегеннен-ақ оқтай түзу көше­лердегі сап түзеген үйлер мен жаңа өмірге, жаңа мекендегі тұщымды тірлікке куә боласың. Құрыш білекті құрылысшылардың күн-түн демей еңбектенуі нәтиже­сінде өмірге қайта келген жаңа ауылға көңіл толады. Бұрынғыдай емес, халықтың жүзінен ерекше жылылық сезіледі. Жиналғандар алдында облыс әкімі Серік Үмбетов Мемлекет басшы­сының тікелей қолдауымен, барша қазақстандықтардың жәрде­мі арқасында қысқа мерзімде тас­қыннан зардап шеккен Қызыла­ғаш, Егінсу, Ақтоған елді мекен­деріндегі қалпына келтіру жұмыс­тары тиянақты атқарылғанына тоқталды. Адамды қуантқаннан артық бақыт жоқ. Көктемдегі жағдайды ұмытуға болмайды. Десек те, оның орнын толтыруға күш салынуда. Бүгін 200 тұрғынға жаңа үйдің кілті тапсыры­лады. Демек, осыншама отбасы қуанады. Бұған дейінгі баспанаға ие болғандар тұрмысқа қажеттіліктермен толық қамтылды. Өздеріңіз көріп отыр­ғандай, көшелер асфальтталып, Алматы-Өскемен қалаларын жал­ғастыратын көпір күзге дейін толық бітеді. Жақында жомарт жандардың демеушілігімен әр үйге теледидар сыйға тартылып, ауыл тұрғындары көгілдір экран қызығын тамашалау мүмкіндігіне ие болды. Телефон байланысы қалпына келтірілді. Енді қалған ауыл тұрғындары айдың аяғына дейін баспаналы болып, жаңа үйлерге толық қоныс­танып бітеді. Өткенде айтылғандай, әр отбасына 10 қой, бір сиыр, бір жылқы беріледі. Күзгі астық жинау мәселесі шешілсе, көкөніс пен бақ­ша дақылдары да кү­тімге алынған. Қоңыр күздегі жиын-теріннен кейінгі алынған өнім өзде­ріңізге таратылады. Бүгінгі күнге кө­мек ретінде әртүрлі қаржы көздерінен келіп түскен қаржы көлемі 7 млрд. 393 млн. теңгеден асты. Бұл қара­жат елді мекендерді толық қал­пына кел­тіру жұмыстарына жұмса­луда. Мәсе­лен, Үкімет резервінен 2548,6 млн. теңге жаңа үйлердің құры­лысына, 253,0 млн. теңге күрделі жөндеу жұ­мыстарына, 500,0 млн. теңге жол мен көшелерді жөндеу, салу жұмыс­та­­­рына мақсатты жұмсалуда, деді әкім. Бұдан кейін облыс басшысы жаңарған ауылдағы Достық, Асар, Мусина, тағы басқа көшелердегі үйлерге қоныстанатын тұрғындарға жаңа үйдің кілттерін табыс етті. Жиналғандар алдында сөйлеген зейнеткер Сайлаубек Сағынбеков, Василий Голущенко, ақтоғандық Лидия Бервинова, Сағи Жаңылбек Мемлекет басшысының, барша қазақстандықтардың қиын сәттегі қолдауы мен облыс әкімінің, құрылыс компанияларының қысқа мерзімдегі қалпына келтіру жұ­мыстарының тиянағын келтіргеніне тоқталып, игі тілектерін жеткізді. – Бүгін ауылда қуанышты сәт. Тасқыннан үйіміз зардап шегіп, ертеңімізге алаңдаған күндер артта қалды. Дегенмен, ауыл дәл бүгін­гідей түрленеді деп ойламадық. Әрине, бұл пендешілігімізден. Үш ай мерзімде үйімнің орнына хан сарайындай баспана салынды. От­басымның бүгінгі қуанышы ерекше. Президентке рахмет. Халыққа рахмет. Қиын сәтте бізге деген қамқорлығы мен демегенін ұмытпаймыз. Жаның қиналғанда жасалған жақсылық есіңде қалып, ұмытылмайды, – деді жаңа үйдің кілтін алған Асыл Ыдырысова. Мұндай лебіздерді өзгелер де айтып жатты. Ауылды Алматы-Өскемен күре жолы кесіп өтеді. Жолдың екі жағалауындағы тұрғын үйлердің жан-жағы қоршалып, саялы ағаш көшеттері отырғызылған. Ертегі­дегідей жаңа қалашықты көргендер қызыққандарын жасырмай, “қан-дай әдемі үйлер” деп там­санды. Білек біріктіргенде бітпейтін істің жоқтығын дәлелдеген Қызыл­ағаштағы қарқынды жұмыс осылай жалғасып, жұртшылық оның игілігіне бөленген. Облыс әкімі жаңа үйлер пай­далануға берілген сайын әр шаңы­раққа кіріп, құтты болсын айтып келеді. Бүгін де сол дәстүрін жал­ғас­тырды. Әкім “Алтын алқалы” ана Қаншайым Абдулдаеваның шаңырағына аялдады. Бұрынғы ескі үйінің орнына салынған баспананың іші мен сырты әсем-ақ. Бөлмелері кең. Батыр ананың Күнсұлу, Айсұлу, Айгүл, Алмагүл, Жә­мила, Динара, Гүлмирасы мен ұлдары Ермек, Берік, келіні Жұл­дыз қонақ күтіп, жүгіріп жүр. Қо­ныс тойына құтты болсын айтқан әжелер шашуын шашса, көршілері Қамаш пен Бақыт та осында. Кейуана өзіне көрсетілген құр­метке аналық алғысын үйіп-төгуде. Әр бөлме жиһазбен, қажетті­ліктермен жабдықталыпты. Газ плитасының үстінде буы бұрқы­раған жас сорпа мен шай қайнап жатыр. Қонақ бөлмедегі үлкен үстел мен орындықтар, жатын бөлмедегі төсектер үймен бірге берілген сыйлық екенін Қаншайым әже айтудан жалықпады. Облыс басшысы бастаған топ Жармұхамед Рүстемов, Болат Қо­жахмет, тағы басқа жаңа шаңы­раққа қоныстанушылардың табал­дырығын аттап, жағдайларымен танысып, жайылған дастарқаннан дәм татыс­ты. Ал ауылдың байырғы тұрғыны чешен ұлтының өкілі Хава Дудай қуаныштан ұялы телефо­нындағы әуенді қосып, билей жөнелді. Сек­сеннен асқан анасы Баята қызының толқыған сәтін қоштап қояды. Жаңа үйлерге сымсыз телефон жүйесі орнатылса, алыс-жақындағы туыстары хабарласып, қызыла­ғаш­тықтарды қуаныштарымен құттық­таған сәтінің де куәсі болдық. Жақ­сы­ға жан жадырайды демекші, жа­ңар­ған, жасарған Қызылағаш ауы­лы­ның бүгінгі тыныс-тіршілігі осындай. Суреттерде: жаңарған ауыл кө­рінісі; жаңа үйлерге қоныстан­ғандардың қуанышты сәттері. Күмісжан БАЙЖАН, Суреттерді түсірген  Жеңіс ЫСҚА­БАЙ. Алматы облысы.