Осындай сөз жазылған үлкен, көшенің жартысын жауып тұрған билбордтар әр ауылда да көзіңе оттай басылады. Түпкі мағынасы: «Автоинспекторларға пара бермеңдер дегенді білдіреді-ау» – деп, түсінсем де, кейде, «автоинспекторларға сонда параны жолдан шығып беруге бола ма екен» деген ой көңіл түкпірімнен қылаң ете қалады. Еріксіз жымиямын. Бұл күлетін сөз емес. Парақорлықты қайтсек жоямыз деген әрекет. Ниет түзу. Бірақ елді анық пара бермеуге шақырған тіркес деп айтуға келмейді.
Менің қынжылатыным, сөз қоры жағынан көптеген халықты артқа тастай тұра халықты парақорлыққа қарсы шығуға бір кісідей шақыратын, және соған көпшілікті жұмылдыратын одан ұтымды тіркес таба алмағанымыз ба? Ішкі істер бөлімі қызметкерлері арасында сөздің парқы мен нарқын терең түсіне алатын адам жоқ дегенге тіпті де сенгім келмейді.
Ішкі істер қызметкерлері деген бүтін бір армия десек те болады. Олардың арасында таңдайлары тақылдаған талай шешендер мен тауып сөйлейтін, бір ауыз сөзімен санаңа көп нәрсені құйып тастайтын саңлақ қызметкерлер бар екендігі сөзсіз.
Бұл жерде үгіт-насихат жұмыстарына жауап беретін кейбір ішкі істер қызметкерлерінің осындай билборд ілдірерде оның мағынасына жан жақты қарамай, тапсырманы асығыс іс жүзіне асыратын тәрізді.
Үгіт-насихат жұмыстары өте жауапкершілікті қажет етеді. Адамдарға рухани қуат беруде, оларды алғы мақсаттарға жігерлендіруде таптырмайтын құрал. Тіпті сананы мүлде өзгертпесе де күрделі әсер ететінін философтар мен саясаткерлер жақсы біледі. Осы мәселеге құқық қорғау органдары да баса мән берсе екен.
Марат ҚАШҚЫНБАЕВ,
журналист
Алматы облысы,
Балқаш ауданы,
Бақанас ауылы
